यात्राको कुनै विन्दुमा
एकाएक बदलिदियो
मेरो कलमले लेखनको
स्वरुप
आजीवन लेख्दा – लेख्दा
जिन्दगीको सफेद
फाइलमा
रङ्गिन रुमानी अक्षरहरू ..!
लेख्दा – लेख्दा एकदिन
डायरिको मध्यपृष्ठमा
अचानक लेखिएछ
“क्रान्ति” !
साशकहरूले
ललकार गरे कलमको
सामर्थ
सायद फिका देखेर हुन
सक्छ मसिको प्रगाढता !
त्यसपछि सुरु भएको हो
बग्न
कलमबाट बारुदको
फ्लेवर !
दृश्यहरू बद्लिएका हुन्
कलमको निब देखिएको
हो
बन्दुकको नाल जस्तो !
र निरन्तर छर्किरहेको हो
अक्षर – अक्षरमा
बारुदका चर्का
छिर्काहरू !
मानौ – अब यो कलम
एक अध्यायको अन्तिम
बिन्दुमा उभिएर
हतपतिएको छ युद्ध गर्न !
हतारिएको छ विस्फोट
हुन
ध्वस्त हुने गरि पुरातन
संरचनाको
यो अति जिर्ण र वृद्ध धुरी !
त्यसपछी लगत्तै
आरम्भको घोषणा गर्न
अर्को सुनौलो अध्याएको ।।
– सुमिना
