नेपाली कम्युनिस्ट पार्टी (नेकपा)ले पुसको पहिलो हप्तासम्म प्रदेश र जिल्लामा एकता समायोजनको काम सक्नेगरी गृहकार्य थालेको छ । कात्तिक १९ गते नेकपा माओवादी केन्द्र, नेकपा एकीकृत समाजवादी लगायत १० वटा वामपन्थी घटकसँग मिलेर यो दल गठन भएको घोषणा गरिएको थियो ।
सोही दिन संयोजकमा पुष्पकमल दाहाल ‘प्रचण्ड’ र सहसंयोजकमा माधवकुमार नेपाल चयन भए पनि केन्द्रीय समितिले पूर्णता पाएको छैन ।
प्रदेश, जिल्ला, स्थानीय तह तथा विभिन्न जनवर्गीय संगठनमा समायोजनको काम अगाडि बढ्न सकेको छैन । एकता समायोजनपछि नेताहरूको जिम्मेवारी र व्यवस्थापन कसरी गर्ने भन्नेमा स्पष्ट खाका तयार भइनसकेको साबिक एकीकृत समाजवादीका उपाध्यक्ष तथा वार्ता टोली सदस्य प्रकाश ज्वालाले जानकारी दिए । अहिले प्रदेश, जिल्ला, पालिका र वडा तहमा एकता सन्देश सभा भइराखेकाले पुस ५ गतेपछि मात्र टुङ्गो लाग्ने उनले स्पष्ट पारे ।
‘अहिले सबै प्रदेश, जिल्ला, पलिकामा एकता सन्देश सभा चलिराखेको छ । पुसको पहिलो हप्तापछि मात्र समायोजनको काम सकिन्छ । एकता प्रक्रियामा जोडिएका नेताहरूको जिम्मेवारी तथा व्यवस्थापन सहमतिकै आधारमा हुन्छ’, ज्वालाले भने ।
साबिक माओवादी केन्द्रका महासचिव तथा वार्ता टोली संयोजक देव गुरुङले पुसको पहिलो हप्तासम्म प्रदेश र जिल्लाको समायोजन कार्य सम्पन्न हुनेगरी काम भइरहेको बताए ।
‘वार्ता टोलीस्तरमै एकता समायोजनको कार्य भइरहेको छ । पुस ५ गतेसम्म हामी एउटा निष्कर्षमा पुग्नेछौँ । नेताहरूको जिम्मेवारीको सवालमा साबिक पार्टीमा जुन तहमा छन्, त्यसै अनुसार नेताहरूको व्यवस्थापन हुनेछ,’ उनले भने ।
गुरुङले केन्द्रमा संयोजक र सहसंयोजकमात्र रहने सहमति भएकाले सोही अनुसार प्रदेश, जिल्ला, पालिका, वडा तह तथा जनवर्गीय संगठनमा जिम्मेवारी दिइने स्पष्ट पारे । स्थानीय तहमा जिल्लास्तरीय नेताहरू बसेर समायोजनको काम सम्पन्न गर्ने उनले बताए ।
नेकपाका संयोजक पुष्पकमल दाहाल ‘प्रचण्ड’ले प्रदेश र जिल्ला तहसम्म पुस ५ गतेभित्र एकता समायोजनको काम सम्पन्न गरिसक्ने बताएका थिए । सोमबार केन्द्रीय कार्यालय पेरिसडाँडामा बसेको बागमती प्रदेश, सम्पर्क समन्वय र विशेष प्रदेशको संयुक्त बैठकमा प्रचण्डले यसबारे जानकारी गराएका थिए । बैठकमा सहसंयोजक माधव कुमार नेपालले यो पार्टी र त्यो पार्टी नभनिकन पार्टी एकतालाई बलियो बनाउनुपर्ने धारणा राखेका थिए ।
एकता सहमतिमा साबिक पार्टीको संगठनात्मक संरचना, संसदीय दल, चल–अचल सम्पत्ति, भौतिक संरचना स्वतः नेकपाको स्वामित्वमा हुने भनिएको छ । वैधानिक रूपमा दलीय मान्यता प्राप्त गर्न निर्वाचन अयोगमा पार्टीको घोषणापत्र, विधान लगायत दस्तावेज पेस गरिएता पनि व्यावहारिक रूपमा कार्यान्वयनमा आइसकेको छैन । अहिले एकता प्रक्रियामा आएका सबै घटकका वार्ताटोली बसेर सबै तहमा पार्टी समायोजन कामलाई टुङ्ग्याउने काम भइरहेको गुरुङले जानकारी दिए ।
वार्ता टोलीमा साबिक माओवादीबाट गुरुङसहित वर्षमान पुन र रेखा शर्मा छन् । साबिक एकीकृत समाजवादीबाट वरिष्ठ नेता डा. बेदुराम भुसालको संयोजकत्वमा वरिष्ठ नेता प्रमेश हमाल र उपाध्यक्ष प्रकाश ज्वाला सदस्य छन् ।
एकता समायोजनमा माओवादी र एकीकृत समाजवादी बाहेक महिन्द्र राय यादव नेतृत्वको नेपाल समाजवादी पार्टी, जनसमाजवादी पार्टी नेपाल, नेकपा(समाजवादी), नेपाल कम्युनिस्ट पार्टी, नेकपा(माओवादी समाजवादी), नेकपा(साम्यवादी), देशभक्त समाजवादी मोर्चा र माओवादी कम्युनिस्ट केन्द्र नेपाल छन् । यसैगरी भीम रावल नेतृत्वको मातृभूमि जागरण अभियान, नेकपा(श्रमजीवी), राजेन्द्र श्रेष्ठ नेतृत्वको जसपा(एकता समूह), जनजागरण पार्टी नेपाल, नेकपा(बहुमत) विद्रोही समूह र नेकपाको विद्रोही समूह एकता प्रक्रियामा जोडिएका छन् ।
यी सबै दललाई समायोजन गर्दा गर्दा १९ सयको हाराहारीमा केन्द्रीय समिति बन्ने वार्ता टोली सदस्य ज्वालाको भनाइ छ । यद्यपि नेकपाको अन्तरिम विधान, २०८२ मा केन्द्रीय कार्यकारी समिति ६०१ सदस्यीय बन्ने व्यवस्था छ ।
