राष्ट्रिय स्वतन्त्र पार्टीका केन्द्रीय सदस्य महेन्द्र पाण्डेसहित सिंगो रास्वपा हुम्ला समिति र प्रचण्डका केन्द्रीय सदस्य तथा पूर्व जनमुक्ति सेनाका कम्पनी कमाण्डर रमेश मोक्तान सहित दर्जनौ नेता कार्यकर्ताहरु नेपाल कम्युनिष्ट पार्टी (माओवादी)मा प्रवेश गरेका छन ।
शुक्रवार काठमाडौमा भएको धुव्रीकरण कार्यक्रममा उनीहरु विप्लव नेतृत्वको नेकपा (माओवादी)मा प्रवेश गरेका हुन ।
रास्वपाबाट धुव्रीकरणमा आएका नेता पाण्डे हुम्ला जिल्ला निवासी तथा विज्ञान शिक्षक हुन् । उनले हुम्लाका करिब ७० प्रतिशत रास्वपाका नेता कार्यकर्ता ल्याएर माओवादीमा प्रवेश गरेका हुन् ।
यस्तै प्रचण्डको नेपाली कम्युनिष्ट पार्टीमा रहेका पूर्व जनमुक्ति सेनाका कम्पनी कमाण्डर मोक्तान पूर्व माओवादी केन्द्रका केन्द्रीय सदस्य हुन् ।
धुव्रीकरणमा नेपाली कम्युनिष्ट पार्टीसंग सम्वद्ध पूर्व जनमुक्ति सेनाका योद्धा वीर बहादुर तामाङ्ग, सुरेश तामाङ्ग,रञ्जन महर्जन, सुरेश वोगटी,पूर्वी रुकुमका सविन बुढा लगायतका दर्जनौ नेता कार्यकर्ताहरु माओवादीमा प्रवेश गरेका छन् ।
नवप्रवेशीहरुलाई नेकपा (माओवादी)का महासचिव विप्लव सीले फुलमाला र खादा लगाएर भव्य स्वागत गरे ।
नवप्रवेशीहरुले नेपालमा राष्ट्रिय स्वाधीनताको आन्दोलनमा विप्लवको नेतृत्वको पार्टीले मात्र देश बचाउन सक्ने देखेको र समाजवादसम्म पुग्ने स्पष्ट खाका देखेकाले माओवादीमा प्रवेश गरेको बताएका छन् ।
रास्वपाबाट धुव्रीकरणमा आएका केन्द्रीय सदस्य पाण्डेले सबै रास्वपाभित्रका इमान्दार नेता कार्यकर्तालाई माओवादीमा आउन र सहि बाटो लिन अपिल गरे । उनले ३ बर्षसम्म रास्वपामा काम गर्दा अन्याय अत्याचारका विरुद्ध विद्रोह गरेको बताए ।
