२०६४ सालमा माओवादीको लहर हुँदा पनि तपाईं झिनो मतान्तरले पराजित हुनुभएको थियो । अहिलेको सन्दर्भ फरक छ । त्यतिबेला तपाईंहरुको जस्तै अहिले नयाँ राजनीतिक शक्तिको लहर चलेको छ । त्यतिबेला चुनाव नजित्नुभएको तपाईंले अहिले आफ्नै बलबुतामा चुनाव जित्न सकिन्छ भन्नेमा विश्वस्त हुनुहुन्छ ?
निर्वाचनमा यदाकदा हावा जोडतोडले बहन्छ । तर त्यो हावा स्वस्थ हो कि प्रदूषित हो भन्ने कुरा जनताले बेलैमा छुट्याउन सक्नुपर्छ । यदि बहिरहेको हावाको सही अर्थ बुझिएन भने तावाको माछा भुंग्रोमा परेझैँ अवस्था आउन सक्छ । जहाँसम्म काठमाडौँ–९ को कुरा छ, म बाहिरबाट आएको ‘टुरिस्ट’ उम्मेदवार होइन । म यहीँ जन्मेको, यहीँको माटोमा खेलेको र यहाँका हरेक नागरिकको पीडा र अप्ठ्यारोसँग साक्षात्कार गरेको व्यक्ति हुँ । हिजो संघर्षको मैदानमा हुँदा पनि म यहाँका जनतासँगै थिएँ, भोलि पनि रहनेछु ।
नेपाली मतदातामा इमानदार र सज्जन मान्छेलाई छान्ने परम्परा छ । ६४ सालमा माओवादीको संगठन यहाँ त्यति बलियो थिएन, तर पनि कांग्रेस, एमाले र राप्रपाका मतदाताले मेरो व्यक्तित्व हेरेर मत दिनुभएको थियो । अहिले पनि मेरो घरदैलो र भेटघाटमा अन्य पार्टीका मतदाताहरूले भन्नुभएको छ– ‘पार्टी हाम्रो आफ्नो ठाउँमा छ, तर देश संकटमा छ । देशलाई संकटबाट मुक्त गर्न तपाईंहरू जस्तो निष्ठावान् व्यक्तिको खाँचो छ ।
तपाईंको मुख्य प्रतिस्पर्धा कोसँग हुन्छ त ?
अहिले राष्ट्रिय स्वतन्त्र पार्टी (रास्वपा) लगायतको हावा चलेको छ, त्यसलाई नकार्न सकिँदैन । मुख्य प्रतिस्पर्धा त्यही माहोलसँग हुन सक्छ । तर एमाले र कांग्रेसका उम्मेदवारहरू पनि हुनुहुन्छ । यद्यपि, एमाले र कांग्रेसका इमानदार कार्यकर्ताहरू आफ्नै पार्टीको घेराभित्र मात्र कैद भएर बस्ने अवस्था छैन । विगतको निर्वाचनमा कांग्रेस र माओवादीको गठबन्धन हुँदा पनि कांग्रेसको मत माओवादी उम्मेदवारलाई ट्रान्सफर नभएको इतिहास छ । त्यसैले दलगत भोट बैंक सधैँ सुरक्षित हुन्छ भन्ने छैन ।
एमालेका कृष्णगोपाल श्रेष्ठले जित्नुभएको क्षेत्र हो यो । तर अहिले एमालेकै साथीहरूसँग पनि मेरो राम्रो संवाद भइरहेको छ । उहाँहरूले पनि परिवर्तन र विकल्प खोजिरहनुभएको छ । मलाई विश्वास छ, यसपटक यहाँका मतदाताले पार्टीको ह्विपभन्दा माथि उठेर व्यक्तिको निष्ठा र एजेन्डालाई प्राथमिकता दिनुहुनेछ । त्यसैले नजित्नुपर्ने कुनै कारण देख्दिनँ ।
नेकपा माओवादीका पोलिटव्युरो सदस्य तथा काठमाडौं क्षेत्र नम्बर ९ बाट प्रतिनिधिसभा निर्वाचनमा होमिएका माइला लामासँग रातापाटी अनलाइनले गरेको कुराकानीको सानो अंश ।
